Akèy / Atik / NOU VLE YON AKÒ POU TOUT KOUCH LADANN.

NOU VLE YON AKÒ POU TOUT KOUCH LADANN.

Nan tout pawòl kap di E nan tout akò pasi pala kap siyen, toujou gen kèk sektè ki toujou rete deyò wonn nan, toujou genyon kategori moun revandikasyon yo pa janm rive enskri nan ansanm desizyon ke bann politisyen payas sa yo ap pran. Malgre pil AKÒ ap siyen se toujou menm penpenp lan, bagay yo toujou rete men’m jan. Pèp toujou grangou, pitit li toujou paka al lekòl.

Se vre anpil sektè patisipe nan rankont yo men yo pa janm mete tout revandikasyon yo. Zafè;
– Prizonye politik yo
– Salè tibèkile ouvriye ouvriyèz faktori ke gwo boujwa malpwòp ap fin souse yo
– zafè libète sendikal yo, kote ouvriye yo ka manifeste mekontantman yo libe libè.
– zafè manb ouvriye tekstil yo.

Jounen jodia, pagen okenn AKÒ vrèman ki pote tout sa mas la ap sibi sitou moun faktori yo. Nap mande tout moun pou yo rete vijilan paske se menm sanginè sa yo ki te plen pòch yo ak lajan CIRH la, lajan PETWOKARIBE a, lajan KOWONA a kote jodia yo menm ankor ap maymoulen kò yo pou pote lajan viktim tranbleman detè 14 Dawout 2021 nan pòch yo ankò. Yo nan tout kalite konplo pou yo ka vin pran tèt peyia pou kontinye piye richès nou yo. Kidonk nou pa nan AKÒ ki pap pote revandikasyon moun ki san defans yo, moun san vwa yo, moun ke yap fin souse san yo, nou pa nan AKÒ ki pap pote sekirite pou tout pitit pèp la.

Fòk enterè pèp la, enterè ouvriye nou yo respekte. Se pou tèt sa nap goumen pou yon peyi kote tout dwe gen menm dwa, yon peyi kote tout moun Kapab viv pou anpeche jèn nou yo kite peyia pou pa al pran imilyasyon nan men blan.

Pèp ayisyen pa janm bliye ke tout politisyen sangwen sa yo pa vin fè anyen pou nou vre, se pòch yo vin plen.
Konplo Joseph Lambert ap marinen poul vin pran tèt peyia, se pou yo ka kontinye piye pèp la. Yo pa panse kreye bon kanmpous Inivèsite pou nou menm pitit mas defavorizea, yo pa panse konstwi kèk lekòl kominal pou ti pèp la. Pèp ayisyen nou dwe leve kanpe poun mete ansanm poun chavire klas politisyen tradisyonèl sal saa ale poun gen yon lòt sosyete kote tout moun ap vin pèzib.

Pèp ayisyen angaje nou!

PRÈS TRAVAYÈ

Apwopo Près Travayè

Ou ka gade tou

AYITI/BANDI: POPILASYON NAN SEN LWI NAN NÒ REVOLTE KONT BANDI…

Pwoblèm ensekirite nan DAyiti se refren ki poko ka finn chante nan zorèy popilasyon an. …